ആര്യനാട്: ഏഷ്യൻ ഗെയിംസിൽ ഇരട്ട വെള്ളി മെഡൽ നേട്ടം കൈവരിച്ച വിദർശ കെ. വിനോദിനെ ആര്യനാട് ഗ്രാമപഞ്ചായത്തിന്റെ നേതൃത്വത്തിൽ ആദരിച്ചു. ആര്യനാട് വൊക്കേഷണൽ ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന ചടങ്ങ് കായിക മന്ത്രി ഒ. ജെ. ജനീഷ് ഉദ്ഘാടനം ചെയ്തു. വിദർശയുടെ ഭർത്താവും പരിശീലകനുമായ മനുവിനെയും ചടങ്ങിൽ ആദരിച്ചു.
കായിക മേഖലയിൽ മികവാർന്ന പ്രകടനം കാഴ്ചവയ്ക്കുന്നവർക്ക് കായിക വകുപ്പിൽ തന്നെ ജോലി ലഭ്യമാക്കാൻ ശ്രമിക്കുമെന്ന് മന്ത്രി പറഞ്ഞു. മെഡൽ ജേതാക്കൾക്കുള്ള സാമ്പത്തിക സഹായവും വൈകാതെ ലഭ്യമാക്കുമെന്ന് മന്ത്രി വ്യക്തമാക്കി.
ആര്യനാടിന്റെ മരുമകൾ എന്ന വിശേഷണം ഏറെ അഭിമാനത്തോടെയാണ് സ്വീകരിക്കുന്നതെന്ന് വിദർശ കെ. വിനോദ് പറഞ്ഞു.
പഞ്ചായത്ത് പ്രസിഡന്റ് അഞ്ജന ജി. നായർ ചടങ്ങിൽ അധ്യക്ഷത വഹിച്ചു. കായികരംഗത്ത് ശ്രദ്ധേയമായ നേട്ടം കൈവരിച്ച താരത്തെ ആദരിക്കാൻ ജനപ്രതിനിധികളും നാട്ടുകാരും പങ്കെടുത്തു.
നാടിന്റെ അഭിമാനമായി മാറിയ കായികതാരത്തിന് ആദരമർപ്പിച്ച ചടങ്ങ് ആവേശകരമായി.
